لاہور: (رائیٹ ناوٴ نیوز)۔ پاکستانی میڈیا کی متنازع شخصیت ڈاکٹر عمر عادل نے معروف اداکارہ نرگس کے رقص کے بارے میں ایک بیان دیا ہے، جس نے سوشل میڈیا پر نئی بحث چھیڑ دی ہے۔ ڈاکٹر عمر عادل نے اپنی گفتگو میں نرگس کے فن کی تعریف کی اور کہا کہ ان کے رقص میں فحاشی نہیں بلکہ خوبصورتی اور روحانیت تھی۔

نرگس ماضی میں تھیٹر اور فلم کی بڑی اسٹار رہی ہیں، جو اپنی اداکاری اور رقص کی مہارت کے لئے مشہور تھیں۔ وہ اپنے دور کی مہنگی ترین اداکاراؤں میں شامل تھیں لیکن بعد میں شوبز کو خیرباد کہہ کر مذہبی تعلیمات کے مطابق زندگی گزارنے لگیں۔

ڈاکٹر عمر عادل نے کہا کہ اگر کسی کو نرگس کے رقص میں فحاشی نظر آتی ہے تو مسئلہ دیکھنے والوں کی نظر میں ہے۔ ان کے بقول نرگس کی پرفارمنس جذباتی ہوتی تھی اور ان کی آنکھوں میں آنسو آجاتے تھے۔

اس بیان پر سوشل میڈیا صارفین نے ملا جلا ردعمل دیا ہے۔ کچھ نے اسے غیر مناسب کہا جبکہ بعض نے حیرت اور تنقید کا اظہار کیا۔

واضح رہے کہ نرگس کا شمار ماضی کی معروف اداکاراؤں میں ہوتا ہے جنہوں نے اپنی اداکاری اور رقص سے شائقین کو متاثر کیا۔