واشنگٹن: (رائیٹ ناوٴ نیوز) امریکی سینٹرل کمانڈ کے مطابق ایران کے خلاف جاری جنگ میں کم از کم 200 امریکی فوجی زخمی ہو چکے ہیں، جبکہ 10 اہلکاروں کی حالت سنگین ہے۔ یہ جنگ 28 فروری سے جاری ہے اور اس دوران امریکی افواج کو متعدد حملوں کا سامنا کرنا پڑا۔

امریکی سینٹرل کمانڈ کے ترجمان کیپٹن ٹم ہاکنز نے بتایا کہ 180 زخمی اہلکار علاج کے بعد دوبارہ ڈیوٹی پر واپس آ چکے ہیں۔ زخمیوں میں جھلسنے، دماغی چوٹوں اور شیل کے ٹکڑوں سے لگنے والے زخم شامل ہیں۔

فوجی حکام کا کہنا ہے کہ بیشتر حملے ایرانی "ون وے” ڈرونز کے ذریعے کیے گئے ہیں۔ جوائنٹ چیفس آف اسٹاف کے چیئرمین جنرل ڈین کین نے کہا کہ زیادہ تر جانی نقصان انہی ڈرون حملوں کے نتیجے میں ہوا۔

امریکی حکام کے مطابق 28 فروری سے شروع ہونے والی اسرائیل۔امریکا جنگ میں اب تک کم از کم 13 امریکی فوجی ہلاک ہو چکے ہیں۔ تازہ اعداد و شمار ظاہر کرتے ہیں کہ زخمیوں کی تعداد ہلاکتوں کے مقابلے میں کہیں زیادہ ہے۔

واضح رہے کہ ایران کے خلاف جاری اس جنگ نے خطے میں کشیدگی بڑھا دی ہے، جبکہ ڈرون اور میزائل حملوں کے باعث امریکی اور اتحادی افواج کو مسلسل خطرات کا سامنا ہے۔