لندن: (رائیٹ ناوٴ نیوز) یونیورسٹی آف ڈربی نے پاکستانی اور بنگلہ دیشی طلبا کے لیے نئی بھرتی عارضی طور پر روک دی ہے۔ یہ فیصلہ برطانیہ کے نئے ویزا قواعد کی بنا پر کیا گیا ہے، کیونکہ ان ممالک سے طلبا کے ویزا مسترد ہونے کی شرح بڑھ گئی ہے۔

برطانیہ کے محکمہ داخلہ نے امیگریشن نظام میں تبدیلیوں کی تجویز دی ہے، جس کے تحت اگر کسی یونیورسٹی کے طلبا کی ویزا مسترد ہونے کی شرح 10 فیصد سے زیادہ ہو تو اس کا بین الاقوامی طلبا کو اسپانسر کرنے کا لائسنس واپس لیا جا سکتا ہے۔

یونیورسٹی کے ترجمان نے کہا کہ جن طلبا کو پہلے ہی داخلے کی تصدیق دی جا چکی ہے، وہ اپنی درخواست کا عمل جاری رکھ سکتے ہیں۔ تاہم، نئی درخواستیں فی الحال منسوخ کر دی گئی ہیں اور پہلے سے رقم جمع کرنے والے طلبا کو مکمل رقم واپس کی جائے گی۔

یونیورسٹی نے واضح کیا ہے کہ یہ فیصلہ عارضی ہے اور پابندی کم از کم خزاں تک برقرار رہنے کا امکان ہے۔ یونیورسٹی آف ڈربی میں دنیا کے 100 سے زائد ممالک سے تقریباً 2 ہزار بین الاقوامی طلبا زیر تعلیم ہیں۔