نئی دہلی: (رائیٹ ناوٴ نیوز) بھارت کی وزارت خارجہ نے آبنائے ہرمز میں ایک تجارتی جہاز پر حملے کی اطلاعات پر گہری تشویش ظاہر کی ہے۔ ‘مایوری ناری’ نامی تھائی جہاز 11 مارچ کو حملے کا شکار ہوا جب وہ بھارت کی بندرگاہ کنڈالا کی جانب روانہ تھا۔

بھارتی وزارت خارجہ کے بیان میں کہا گیا کہ مغربی ایشیا کے جاری تنازع کے دوران تجارتی جہازوں کو نشانہ بنایا جانا قابل تشویش ہے۔ حملوں میں قیمتی انسانی جانیں ضائع ہو چکی ہیں جن میں بھارتی شہری بھی شامل ہیں۔

بیان میں مزید کہا گیا کہ حالیہ حملوں کی شدت اور مہلک نوعیت میں اضافہ ہو رہا ہے، جو عالمی تجارت اور سمندری راستوں کی سلامتی کو متاثر کر سکتا ہے۔ بھارت نے عالمی برادری سے مطالبہ کیا کہ سمندری نقل و حمل کی آزادی کو یقینی بنایا جائے۔

یہ خدشات ایران اور اسرائیل کے درمیان حالیہ کشیدگی کے بعد آبنائے ہرمز اور خلیج فارس میں تجارتی جہاز رانی کی سلامتی کے حوالے سے بڑھ گئے ہیں۔