واشنگٹن: (رائیٹ ناوٴ نیوز) امریکا اور اسرائیل کی ایران کے خلاف فوجی کارروائی کے نتیجے میں عالمی توانائی منڈیوں میں شدید ردعمل سامنے آیا ہے۔ یورپ میں گیس کی قیمتوں میں 20 فیصد اضافہ ہوا جبکہ خام تیل، قیمتی دھاتوں اور عالمی اسٹاک مارکیٹس میں بھی اتار چڑھاؤ دیکھنے کو ملا۔

لندن کی آئس ایکسچینج کے مطابق نیدرلینڈز کے ٹی ٹی ایف مرکز پر اپریل فیوچر معاہدوں کی قیمت تقریباً 470 ڈالر فی 1000 مکعب میٹر تک پہنچ گئی، جو 47.375 یورو فی میگاواٹ آور بنتی ہے، جنوری کے بعد یہ بلند ترین سطح ہے۔

برینٹ خام تیل کی قیمت مشرق وسطیٰ میں کشیدگی کے باعث 82 ڈالر سے تجاوز کر گئی تھی تاہم بعد میں یہ 77.11 ڈالر فی بیرل پر آگئی۔ ماہرین کا کہنا ہے کہ تنازع کے جاری رہنے کی صورت میں تیل کی قیمتیں 80 سے 100 ڈالر فی بیرل تک پہنچ سکتی ہیں۔

روسی ماسکو ایکسچینج میں موئیکس انڈیکس میں 1.29 فیصد اضافہ ہوا جبکہ ٹوکیو اسٹاک ایکسچینج میں کمی دیکھی گئی۔ ہانگ کانگ کے ہینگ سینگ انڈیکس اور بھارتی بی ایس ای سینسیکس میں بھی کمی ریکارڈ کی گئی۔

قیمتی دھاتوں کے بازار میں اضافہ ہوا ہے۔ نیو یارک مرکنٹائل ایکسچینج پر پیلاڈیم میں 0.33 فیصد اضافہ ہوا جبکہ پلاٹینم کی قیمت 1.72 فیصد بڑھی۔ تجزیہ کاروں کے مطابق آبنائے ہرمز میں بحری نقل و حمل متاثر ہونے کی صورت میں قیمتوں میں مزید اضافہ ہو سکتا ہے۔