کراچی: (رائیٹ ناوٴ نیوز) رمضان المبارک میں افطاری کی تیاری گھریلو خواتین کے لیے ایک بڑا چیلنج ہوتا ہے، جس میں فروٹ چاٹ کو تازہ اور خوش رنگ رکھنا شامل ہے۔

پہلے سے کاٹے گئے پھل فریج میں رکھنے کے بعد اپنی تازگی اور رنگت کھو دیتے ہیں، جس سے افطار کی ڈش کی کشش متاثر ہوتی ہے۔ ماہرین نے مشورہ دیا ہے کہ پھل کاٹنے کے فوراً بعد انہیں ایئر ٹائٹ ڈبے میں محفوظ کیا جائے اور افطار کے وقت ہی اس میں لیموں، چینی، چاٹ مسالہ یا دیگر اجزا شامل کیے جائیں۔

ماہرین کے مطابق، فروٹ چاٹ کے لیے کیلے کو پہلے سے کاٹ کر فریج میں نہیں رکھنا چاہیے کیونکہ یہ جلد سیاہ پڑ جاتا ہے۔ پھل نازک ہوتے ہیں اور اگر ان میں پہلے سے نمک، چینی یا مسالے شامل کردیے جائیں تو وہ پانی چھوڑ دیتے ہیں اور اپنی اصل رنگت اور ساخت کھو دیتے ہیں۔

بہترین طریقہ یہ ہے کہ تمام پھل سادہ حالت میں ٹھنڈے کرکے رکھے جائیں اور افطار سے کچھ دیر پہلے ان میں لیموں، چاٹ مسالہ یا دیگر اجزا شامل کیے جائیں۔ اس سے فروٹ چاٹ تازہ اور دلکش نظر آتی ہے اور اس کا ذائقہ بھی بہتر رہتا ہے۔