اسلام آباد: (رائیٹ ناوٴ نیوز) صدر مملکت آصف علی زرداری نے پاکستان بوائے اسکاؤٹس ایسوسی ایشن کے پانچ لاکھ سے زائد اسکاؤٹس کو مبارکباد دی ہے۔ انہوں نے کہا کہ اسکاؤٹنگ نوجوانوں کی جسمانی، ذہنی اور روحانی نشوونما میں اہم کردار ادا کرتی ہے اور نوجوانوں کو کردار سازی پر توجہ دینی چاہیے۔

صدر زرداری نے مزید کہا کہ اسکاؤٹس کو گرین اور موسمیاتی لحاظ سے محفوظ پاکستان کے لیے متحرک ہونا چاہیے۔ انہوں نے منشیات سے پاک اور ڈیجیٹل طور پر بااختیار قوم کی تشکیل کی اہمیت پر زور دیا۔

انہوں نے کہا کہ ہنگامی حالات اور ڈیزاسٹر مینجمنٹ میں اسکاؤٹس کا کردار ناگزیر ہے۔ پاکستان سے پولیو کے خاتمے میں اسکاؤٹس کی فعال شمولیت ضروری ہے۔ قائد اعظم نے اسکاؤٹنگ کو نوجوانوں کی کردار سازی کے لیے اہم قرار دیا تھا۔

صدر زرداری نے کہا کہ پاکستان بوائے اسکاؤٹس ایسوسی ایشن عالمی سطح پر مزید مؤثر کردار ادا کرے گی اور اسکاؤٹس قوم کی تعمیر میں مؤثر محرک ثابت ہوں گے۔