سڈنی: (رائیٹ ناوٴ نیوز) سابق آسٹریلوی کپتان رکی پونٹنگ نے آئی سی سی مینز ٹی ٹوئنٹی ورلڈ کپ 2026 کے سپر ایٹ مرحلے میں پاکستان کے نوجوان اوپنر صائم ایوب کو اہم کھلاڑی قرار دیا ہے۔

پونٹنگ نے انٹرویو میں صائم کا موازنہ جنوبی افریقا کے بلے باز ڈیوالڈ بریوس سے کرتے ہوئے کہا کہ صائم ایوب ایسی صلاحیت ہیں جو میچ کا پانسہ پلٹ سکتے ہیں۔ اگر صائم چند اچھی اننگز کھیلنے میں کامیاب ہو جائیں تو پاکستان کو شکست دینا مشکل ہوگا۔

تاہم موجودہ ٹورنامنٹ میں صائم کی کارکردگی غیر مستقل رہی ہے۔ نیدرلینڈز کے خلاف انہوں نے 24 رنز بنانے کے ساتھ 2 وکٹیں حاصل کیں جبکہ امریکا کے خلاف 19 رنز اسکور کیے۔ بھارت کے خلاف میچ میں وہ صرف 6 رنز بنا سکے لیکن 3 کھلاڑی آؤٹ کیے۔ نمیبیا کے خلاف 14 رنز بنائے مگر کوئی وکٹ حاصل نہ کر سکے۔

رواں سال کھیلے گئے آخری 9 ٹی ٹوئنٹی میچز میں صائم نے 142 رنز بنانے کے ساتھ 8 وکٹیں حاصل کی ہیں۔ پاکستان نے گروپ اے میں تین فتوحات کے ساتھ دوسری پوزیشن حاصل کی اور اب سپر ایٹ مرحلے میں نیوزی لینڈ، انگلینڈ اور سری لنکا سے مقابلہ کرے گا۔