واشنگٹن: (رائیٹ ناوٴ نیوز) امریکی افواج نے بحر ہند میں ایک تیل بردار جہاز ویرونیکا III کو روک لیا ہے، جو کیریبین میں امریکی ناکہ بندی سے بچنے کی کوشش کر رہا تھا۔ پینٹاگون کے مطابق یہ جہاز پاناما کے پرچم کے تحت چل رہا تھا اور اس نے امریکی صدر ڈونلڈ ٹرمپ کی جانب سے وینزویلا سے وابستہ بحری جہازوں پر عائد پابندیوں کو توڑنے کی کوشش کی تھی۔

امریکی فورسز نے جہاز کا تعاقب کرتے ہوئے بالآخر بحر ہند میں اسے روک لیا۔ اس موقع کی ویڈیو بھی جاری کر دی گئی ہے، جس میں امریکی اہلکار ہیلی کاپٹر کے ذریعے جہاز پر اترتے دکھائی دیتے ہیں۔ مزید بتایا گیا کہ وینزویلا کئی برسوں سے تیل پر امریکی پابندیوں کا سامنا کر رہا ہے اور عالمی منڈی تک تیل پہنچانے کے لیے شیڈو فلیٹ کا استعمال کیا جا رہا تھا۔

امریکی وزیر توانائی کرس رائٹ کے مطابق وینزویلا سے ضبط کیے گئے تیل کی فروخت سے ایک ارب ڈالر سے زائد رقم حاصل ہو چکی ہے۔ دوسری جانب پاناما میری ٹائم اتھارٹی نے کہا ہے کہ ویرونیکا III کو دسمبر 2024 میں پاناما کے رجسٹر سے خارج کر دیا گیا تھا۔

ماہرین کے مطابق یہ کارروائیاں امریکا کی حکمت عملی کا حصہ ہیں جس کا مقصد وینزویلا کی تیل برآمدات کو محدود کرنا ہے، جو عالمی بحری تجارت اور خطے کی سیاست کو متاثر کر سکتی ہیں۔