لاہور: (رائیٹ ناوٴ نیوز) سابق وزیر اعلیٰ پنجاب حمزہ شہباز نے سیاسی منظرنامے میں ممکنہ واپسی کا اشارہ دیتے ہوئے کہا ہے کہ کارکن جماعت کا اصل سرمایہ ہیں اور ان کے بغیر پارٹی کی کوئی حیثیت نہیں۔ انہوں نے یہ بات رواں ہفتے صحافیوں سے غیر رسمی ملاقات میں کہی۔

حمزہ شہباز نے صوبے میں بعض پارٹی رہنماؤں کی جانب سے نظر انداز کیے جانے کی شکایات پر ردعمل دیتے ہوئے کہا کہ وہ کارکنوں اور رہنماؤں کے تحفظات دور کرنے میں اپنا کردار ادا کریں گے۔ انہوں نے کسی باضابطہ عہدے سے متعلق تفصیلات نہیں بتائیں تاہم مرکزی سیاست میں کردار ادا کرنے کا عندیہ دیا۔

عام انتخابات کے بعد وزارت اعلیٰ کا منصب چھوڑنے کے بعد وہ عملی سیاست میں کم دکھائی دیتے رہے۔ اس سے قبل بھی انہوں نے سیاسی مستقبل سے متعلق سوال پر کہا تھا کہ وہ معاملات کو وقت پر چھوڑ رہے ہیں۔

ادھر صوبے میں بعض اراکین اسمبلی نے نجی طور پر موجودہ صوبائی حکومت کے انداز پر تحفظات کا اظہار کیا ہے۔ ذرائع کے مطابق شکایات میں فیصلہ سازی میں شمولیت اور قیادت تک محدود رسائی جیسے امور شامل ہیں۔

حمزہ شہباز نے بسنت سمیت دیگر تقریبات کے بڑھتے اخراجات پر بھی تشویش ظاہر کی۔ ان کا کہنا تھا کہ بسنت کبھی ہر طبقے کا تہوار تھا لیکن اب یہ محدود حلقوں تک رہ گیا ہے۔