امریکا نے ایران پر دباؤ بڑھانے کے لیے دوسرا طیارہ بردار بیڑا مشرق وسطیٰ بھیجنے کی تیاری کی ہے۔
واشنگٹن: (رائیٹ ناوٴ نیوز) امریکا اور ایران کے درمیان جوہری مذاکرات سست روی کا شکار ہیں، تاہم دونوں فریقین نے امید ظاہر کی ہے۔
اس کے باوجود امریکا نے ایران پر دباؤ بڑھانے کے لیے مشرق وسطیٰ میں دوسرا طیارہ بردار بحری بیڑا بھیجنے کی تیاری شروع کردی ہے۔ امریکی حکام نے جنگی بیڑے یو ایس ایس جارج ایچ ڈبلیو بش کیریئر اسٹرائیک گروپ کو روانگی کے لیے تیار رہنے کی ہدایت کی ہے۔
یو ایس ایس جارج ایچ ڈبلیو بش، ایک نیوکلیئر طاقت سے چلنے والا سپر کیریئر، اس وقت ورجینیا کے ساحل کے قریب تربیتی مشقوں میں مصروف ہے اور آئندہ دو ہفتوں میں روانگی کے لیے مختصر شیڈول کے تحت تیار کیا جا رہا ہے۔
یہ جہاز نِمِٹز کلاس کا جدید ترین اور آخری طیارہ بردار بحری جہاز ہے، جس نے 2023 کے اوائل میں بڑی تعیناتی مکمل کی تھی اور اب دوبارہ تیز رفتار تعیناتی کیلئے ہائی الرٹ پر ہے۔
اگر یو ایس ایس جارج ایچ ڈبلیو بش مشرق وسطیٰ پہنچتا ہے تو وہ یو ایس ایس ابراہام لنکن کے ساتھ شامل ہوگا جو جنوری کے آخر میں بحیرۂ عرب پہنچ چکا ہے، ماہرین کے مطابق یہ ایران کیلئے واضح عسکری پیغام ہوگا۔
