ممبئی: (رائیٹ ناوٴ نیوز) بولی ووڈ سپراسٹار رنویر سنگھ کو واٹس ایپ پر مبینہ دھمکی آمیز وائس نوٹ موصول ہونے کے بعد ان کی سیکیورٹی بڑھا دی گئی ہے۔ پیغام بھیجنے والے نے خود کو بدنام زمانہ لارنس بشنوئی گینگ سے منسلک بتایا اور کروڑوں روپے تاوان کا مطالبہ کیا۔

رنویر سنگھ نے فوری طور پر ممبئی پولیس کو اطلاع دی، جس پر پولیس نے ان کی رہائش گاہ کے باہر اضافی نفری تعینات کر دی۔ اس میں نجی سیکیورٹی گارڈز بھی شامل ہیں۔ پولیس کی سائبر اور تکنیکی ٹیمیں وائس نوٹ کے اصل ماخذ تک پہنچنے کی کوشش کر رہی ہیں۔

سیکیورٹی میں اضافے سے عمارت کے دیگر رہائشیوں میں اضطراب پیدا ہوا، جنہوں نے پولیس سے وضاحت طلب کی۔ پولیس حکام وائس نوٹ بھیجنے والے تک پہنچنے کی کوشش میں ہیں، لیکن ابھی تک کسی کی گرفتاری عمل میں نہیں آئی ہے۔

یہ دھمکی چند روز قبل ممبئی میں فلمساز روہت شیٹی کے گھر کے باہر فائرنگ کے واقعے کے بعد آئی ہے، جس کی ذمہ داری لارنس بشنوئی گینگ نے سوشل میڈیا پر قبول کی۔

لارنس بشنوئی گینگ شہرت یافتہ شخصیات کو دھمکانے اور سنگین جرائم میں ملوث رہی ہے، اور پولیس معاملے کی مکمل تحقیقات کر رہی ہے۔