لندن: (رائیٹ ناوٴ نیوز) برطانیہ میں کی گئی ایک تحقیق کے مطابق آرٹی فیشل انٹیلی جنس (اے آئی) چیٹ بوٹس کو طبی مشورے کے لیے استعمال کرنے سے صحت کو خطرات لاحق ہوسکتے ہیں۔ آکسفورڈ یونیورسٹی کی اس تحقیق میں بتایا گیا کہ اے آئی چیٹ بوٹس کی جانب سے دیے گئے مشورے اکثر ناقص اور غیر مستحکم ہوتے ہیں، جن سے صارفین کو درست مشورہ حاصل کرنا مشکل ہوتا ہے۔

تحقیق میں 1300 افراد کو شامل کیا گیا، جن میں سے ایک گروپ کو اے آئی سے مشورہ لینے کی ہدایت دی گئی۔ نتائج سے معلوم ہوا کہ اے آئی سے اکثر متضاد جوابات ملتے ہیں، جس کی وجہ سے صارفین کے لیے درست مشورہ پہچاننا مشکل ہوجاتا ہے۔

محققین نے کہا کہ اے آئی ماڈلز کی طبی تفصیلات فراہم کرنے کی صلاحیت تو ہے، مگر صارفین کی جانب سے معلومات کی عدم فراہمی یا چھپانے کی وجہ سے مشورہ غلط ہوسکتا ہے۔ اس تحقیق کا مقصد زیادہ محفوظ اور کارآمد اے آئی سسٹمز کی تیاری میں مدد فراہم کرنا ہے۔