ہانگ کانگ: (رائیٹ ناوٴ نیوز) ہانگ کانگ کے معروف میڈیا ٹائیکون اور ایپل ڈیلی کے بانی جمی لائی کو قومی سلامتی کے قوانین کے تحت 20 سال قید کی سزا سنائی گئی ہے۔ جمی لائی پر غیر ملکی قوتوں سے سازباز اور بغاوت پر مبنی مواد کی اشاعت کا الزام تھا۔

جمی لائی کی گرفتاری اگست 2020 میں ہوئی تھی اور انہیں دسمبر 2025 میں قصوروار ٹھہرایا گیا تھا۔ عدالت نے جمی لائی کو تین سازشوں کا مرکزی منصوبہ ساز قرار دیا اور سزا میں سختی کی وجہ ان کی مسلسل غیر ملکی قوتوں سے سازباز بتائی۔

عدالت نے کہا کہ سازشوں کے تحت امریکا اور دیگر ممالک سے پابندیاں اور ناکہ بندیاں کروانے کی کوشش کی گئی۔ ایپل ڈیلی کے عملے اور دیگر افراد بھی اس نیٹ ورک کا حصہ تھے۔

جمی لائی کے علاوہ ایپل ڈیلی کے چھ سابق سینئر عملے کے ارکان کو بھی 6 سے 10 سال قید کی سزائیں دی گئیں۔ جمی لائی نے الزامات کی تردید کی اور خود کو سیاسی قیدی قرار دیا۔

عالمی رہنماؤں نے جمی لائی کے خلاف کارروائی پر تنقید کی، جن میں امریکی صدر ڈونلڈ ٹرمپ اور برطانوی وزیرِاعظم کیئر اسٹارمر شامل ہیں۔