مسقط: (رائیٹ ناوٴ نیوز) امریکا اور ایران کے حکام کے درمیان عمان کے دارالحکومت مسقط میں مذاکرات شروع ہوگئے ہیں، جس کا مقصد خطے میں بڑھتی کشیدگی کو کم کرنا ہے۔ ان مذاکرات میں ایرانی وزیر خارجہ عباس عراقچی اور امریکا کی جانب سے صدر ٹرمپ کے مشیر اسٹیو وٹکوف اور داماد جیرڈ کشنر شریک ہیں۔

ایرانی وزارت خارجہ کے ترجمان نے بتایا کہ ان مذاکرات کا مقصد جوہری مسئلے پر منصفانہ معاہدے تک پہنچنا ہے۔ اطلاعات کے مطابق امریکا، ایران کے جوہری پروگرام کے علاوہ دیگر مسائل کو بھی زیر بحث لانے کی کوشش کر رہا ہے، جس پر ایران کی مخالفت ہے۔

یہ مذاکرات ایسے وقت میں ہو رہے ہیں جب دونوں ممالک کے تعلقات میں کشیدگی عروج پر ہے اور کسی بھی غلط قدم کے نتیجے میں فوجی تصادم کا خطرہ موجود ہے۔ صدر ٹرمپ نے واشنگٹن میں ایک تقریب میں کہا کہ امریکا کا بحری بیڑا ایران کی طرف بڑھ رہا ہے، جو امریکی طاقت کا مظہر ہے۔