کراچی: (رائیٹ ناوٴ نیوز) عالمی بینک کے صدر اجے بنگا نے کہا ہے کہ پاکستان کو آئندہ دس برسوں میں 25 سے 30 ملین نئی نوکریاں پیدا کرنا ہوں گی، ورنہ بے روزگاری اور عدم استحکام کے خطرات بڑھ سکتے ہیں۔ انہوں نے بتایا کہ پاکستان نوجوان آبادی کے اہم مرحلے میں ہے، جہاں روزگار کی فراہمی معاشی ترقی کے لیے ضروری ہے۔

اجے بنگا کے مطابق، پاکستان عالمی بینک کے دس سالہ کنٹری پارٹنرشپ فریم ورک کے نفاذ کے مرحلے میں ہے، جس کے تحت سالانہ 4 ارب ڈالر کی سرکاری و نجی سرمایہ کاری متوقع ہے۔ انہوں نے کہا کہ روزگار حکمت عملی انسانی و جسمانی انفرااسٹرکچر، کاروبار دوست اصلاحات اور چھوٹے کاروباروں کو مالی سہولتوں تک رسائی پر مبنی ہے۔

انہوں نے کہا کہ توانائی کا شعبہ فوری توجہ کا متقاضی ہے، کیونکہ ترسیل میں نقصانات اور مالی خسارہ معاشی ترقی میں رکاوٹ بن رہے ہیں۔ نجی شعبے کی شمولیت سے نقصانات کم ہوں گے اور سرمایہ کاری کے مواقع بڑھیں گے۔