بیروت: (رائیٹ ناوٴ نیوز) اسرائیلی فضائی حملوں کے نتیجے میں لبنان کے جنوبی علاقوں میں ایک شخص جاں بحق اور آٹھ افراد زخمی ہو گئے ہیں۔ اسرائیلی فوج نے پیر کے روز مختلف علاقوں میں کارروائیاں کیں، جن میں رہائشی علاقے نشانہ بنائے گئے۔

لبنان کی سرکاری خبر رساں ایجنسی کے مطابق حملے جنوبی قصبوں کفر تبنیت اور عین قانا میں کیے گئے، جہاں عمارتوں کو نشانہ بنایا گیا۔ عین قانا میں دھویں کے مناظر بھی دیکھے گئے ہیں۔

اسرائیلی فوج نے ان قصبوں کے لیے انخلا کی وارننگ جاری کی تھی اور کہا کہ حملوں کا مقصد اسلحہ ذخیرہ کرنے کی تنصیبات کو نشانہ بنانا تھا، لیکن لبنانی حکام کے مطابق بمباری رہائشی علاقوں میں ہوئی۔

لبنان کی وزارت صحت کے مطابق انصاریہ میں ایک حملے میں ایک شخص جاں بحق اور چار افراد زخمی ہوئے، جب کہ قلیلہ میں مزید چار افراد زخمی ہوئے۔ لبنانی میڈیا کے مطابق بعض گاڑیوں کو بھی نشانہ بنایا گیا اور کارروائیاں بغیر پیشگی وارننگ کے کی گئیں۔

واضح رہے کہ نومبر 2024 میں جنگ بندی معاہدے کے باوجود اسرائیل مسلسل لبنان میں حملے کر رہا ہے اور اب تک 360 سے زائد افراد جاں بحق ہو چکے ہیں۔ لبنان نے ان حملوں کو جنگ بندی معاہدے کی خلاف ورزی قرار دیتے ہوئے احتجاج کیا ہے۔