اسلام آباد: (رائیٹ ناوٴ نیوز) قومی اقتصادی کونسل کی ایگزیکٹو کمیٹی نے 240 ارب روپے سے زائد لاگت کے چار ترقیاتی منصوبوں کی منظوری دی ہے۔ یہ منظوری نائب وزیر اعظم اور وزیر خارجہ محمد اسحاق ڈار کی صدارت میں اجلاس کے دوران دی گئی، جس میں جاری اور نئے ترقیاتی منصوبوں پر غور کیا گیا۔

منظور کردہ منصوبوں میں AFIC-NIHD راولپنڈی کی توسیع، وزیر اعظم یوتھ اسکل ڈیولپمنٹ پروگرام، کراچی یلو لائن بی آر ٹی کوریڈور اور گلگت بلتستان میں ہارپو ہائیڈرو پاور منصوبہ شامل ہیں۔ ہارپو منصوبے سے 34.5 میگاواٹ بجلی پیدا ہوگی۔

اجلاس میں وفاقی وزیر خزانہ، وزیر منصوبہ بندی، اور دیگر اعلیٰ حکام نے شرکت کی جبکہ وزارت خزانہ، اقتصادی امور ڈویژن، نیوٹیک کے حکام بھی موجود تھے۔ منصوبوں کی لاگت اور عملدرآمد کے مختلف پہلوؤں پر تفصیلی بریفنگ دی گئی۔