پشاور: (رائیٹ ناوٴ نیوز) محکمہ ایکسائز خیبر پختونخوا نے مزید 40 چوائس نمبر پلیٹس کی نیلامی کا اعلان کیا ہے۔ نیلامی 14 فروری کو منعقد ہوگی جس میں سید، قادری، جتوئی، راجہ، پشتون سمیت دیگر ناموں کی نمبر پلیٹس پیش کی جائیں گی۔

نیلامی میں خیبر، بونیر، مہمند، کوہاٹ اور دیگر اضلاع کے نام سے منسوب نمبر پلیٹس بھی رکھی جائیں گی۔ محکمہ کے مطابق ہر منفرد چوائس نمبر پلیٹ کے لیے بولی کی بنیادی رقم 10 لاکھ روپے مقرر کی گئی ہے۔ اگر کسی پلیٹ کے لیے بولی دہندگان کی تعداد تین سے کم ہوئی تو نیلامی ملتوی ہو جائے گی۔

بولی میں شرکت کے خواہشمند افراد کو ایک لاکھ روپے بطور سیکیورٹی جمع کرانا ہوگا جبکہ کامیاب بولی دہندہ کو نیلامی کے فوراً بعد مکمل رقم ادا کرنا ضروری ہوگا۔ محکمہ ایکسائز نے یقین دہانی کرائی ہے کہ نیلامی کے تمام مراحل شفاف طریقے سے مکمل کیے جائیں گے۔