ممبئی: (رائیٹ ناوٴ نیوز) بالی ووڈ کی معروف اداکارہ تبو نے انکشاف کیا ہے کہ انہوں نے کبھی اپنے والد کا سرنیم استعمال نہیں کیا۔

تبو نے ایک انٹرویو میں بتایا کہ ان کے والدین کی علیحدگی اس وقت ہوئی تھی جب وہ صرف تین سال کی تھیں، جس کے بعد ان کی پرورش والدہ اور نانا نانی نے حیدرآباد میں کی۔ ان کے مطابق انہیں والد کے ساتھ وقت گزارنے کا کوئی خاص یاد نہیں ہے، اسی لیے والد کا نام یا سرنیم ان کے لیے کبھی اہمیت نہیں رکھتا۔

اداکارہ نے بتایا کہ اسکول کے زمانے میں بھی ان کا نام صرف تبو یا فاطمہ کے طور پر درج تھا اور انہوں نے کبھی والد کا سرنیم استعمال کرنے کی ضرورت محسوس نہیں کی۔ انہوں نے واضح کیا کہ یہ ان کا فطری فیصلہ تھا اور اس حوالے سے کوئی تلخی یا شکوہ نہیں رکھتیں۔

مزید برآں، تبو نے کہا کہ مضبوط خواتین کے ماحول میں پرورش پانے کی وجہ سے وہ خودمختار سوچ رکھتی ہیں اور ہمیشہ اپنے فیصلے خود کرتی آئی ہیں۔

تبو بالی ووڈ کی صفِ اول کی اداکاراؤں میں شمار ہوتی ہیں اور ان کی فنی صلاحیتوں کے ساتھ ساتھ ان کی ذاتی زندگی بھی مداحوں کے لیے دلچسپی کا باعث رہتی ہے۔