اسلام آباد: (رائیٹ ناوٴ نیوز) پاکستان اسٹیل ملز کی چوری شدہ اثاثوں کی بڑھتی خطرات کے باعث بعض اثاثوں کی نیلامی کا فیصلہ کیا گیا ہے۔ قومی اسمبلی کی ذیلی کمیٹی برائے صنعت و پیداوار کے اجلاس میں حکام نے بتایا کہ 11 کے وی کی بجلی کی تاریں بھی چوری ہو چکی ہیں۔

ایڈیشنل سیکرٹری صنعت و پیداوار نے کمیٹی کو آگاہ کیا کہ اثاثے چوری سے بچانے کے لیے وہ اشیاء نیلام کی جارہی ہیں جن کے چوری ہونے کا خطرہ زیادہ ہے۔ انہوں نے مزید کہا کہ 2010 میں اسٹیل ملز میں 30 ہزار ملازمین تھے جبکہ 5 ہزار ملازمین سے کام چل سکتا تھا۔ جولائی 2024 سے ڈیلی ویجز اور کنٹریکٹ ملازمین کے معاہدے ختم کر دیے گئے اور ان میں سے 85 فیصد کو گھوسٹ ملازمین قرار دیا گیا۔

اجلاس میں انکشاف ہوا کہ اسٹیل ملز کے بند ہونے کے باوجود بجلی کا بل 27 کروڑ روپے موصول ہوا، جس میں سے گزشتہ ماہ اڑھائی کروڑ روپے ادا کیے گئے۔ حکام نے بتایا کہ روس اسٹیل ملز کی بحالی میں دلچسپی رکھتا ہے اور سرمایہ کاروں سے بات چیت جاری ہے۔