بلوچستان نے پہلی بار آرٹیفیشل انٹیلیجنس کی مدد سے 100 سے زائد سرکاری آسامیوں پر بھرتی کا عمل مکمل کیا، جس سے شفافیت اور رفتار کو یقینی بنایا گیا۔
کوئٹہ: (رائیٹ ناوٴ نیوز) بلوچستان نے پاکستان کی تاریخ میں پہلی بار 100 سے زائد سرکاری آسامیوں پر آرٹیفیشل انٹیلیجنس کی مدد سے بھرتی کا عمل مکمل کیا ہے۔
یہ عمل 18 جنوری کو مکمل ہوا جب صوبائی محکمہ خزانہ میں سب اکاؤنٹنٹس کی آسامیوں پر بھرتی کا پورا عمل اے آئی پر مبنی نظام کے تحت انجام دیا گیا۔ اس میں سوالات کی تیاری سے امتحان، جانچ، شارٹ لسٹنگ اور تقرری کے احکامات کا اجراء تک کا ہر مرحلہ الگورتھم کے ذریعے مکمل ہوا۔
وزیراعلیٰ بلوچستان سرفراز بگٹی نے کامیاب امیدواروں میں تقرری کے خطوط تقسیم کیے، جن کا انتخاب ایک خودکار نظام نے کیا تھا۔ اس اقدام کا مقصد شفافیت، رفتار اور کم لاگت کو یقینی بنانا تھا۔
سوالیہ بینک میں 30 ہزار سوالات شامل تھے اور امتحان کے دوران ہر امیدوار کو منفرد پرچہ دیا گیا۔ امتحان مکمل کرنے پر فوری نتائج مرکزی اسکرین پر ظاہر ہوئے۔
