اسلام آباد: (رائیٹ ناوٴ نیوز) وفاقی حکومت نے اسلام آباد انٹرنیشنل ایئرپورٹ کو فعال نجکاری فہرست میں شامل کرنے کی منظوری دے دی ہے۔ یہ فیصلہ متحدہ عرب امارات کی جانب سے معاہدے میں مسلسل تاخیر اور عدم دلچسپی کے بعد کیا گیا ہے۔

پاکستانی حکومت نے یو اے ای کو بارہا یاد دہانی کرائی کہ وہ اسلام آباد ایئرپورٹ کی آؤٹ سورسنگ کے لیے نامزد ادارے کا نام فراہم کریں، لیکن وہ اس میں ناکام رہے۔ اس کے بعد حکومت نے ایئرپورٹ کو نجکاری کی فہرست میں شامل کرنے کا فیصلہ کیا۔

پاکستانی حکام نے کابینہ کمیٹی برائے نجکاری کو اسلام آباد، کراچی اور لاہور ایئرپورٹس کو نجکاری فہرست میں شامل کرنے کی تجویز دی۔ کمیٹی نے اب کراچی اور لاہور ایئرپورٹس کی شمولیت کی منظوری دے دی ہے جبکہ اسلام آباد ایئرپورٹ کو بھی شامل کیا جا رہا ہے۔

یو اے ای کے ساتھ معاہدے کی ناکامی کے بعد حکومت نے اصولی طور پر فیصلہ کیا کہ یو اے ای کے ساتھ معاہدہ بند کر دیا جائے اور اسلام آباد ایئرپورٹ کو نجکاری فہرست میں شامل کیا جائے۔