لاہور میں بارش سے 150 فیڈرز ٹرپ کر گئے، بجلی بندش کا سامنا۔
لاہور: (رائیٹ ناوٴ نیوز) ملک بھر کے میدانی علاقوں میں بارش اور پہاڑوں پر برفباری کے باعث حالات متاثر ہو رہے ہیں۔ لاہور میں بھی شدید بارش کے نتیجے میں لیسکو کے 150 سے زائد فیڈرز ٹرپ کر گئے ہیں، جس سے متعدد علاقوں میں بجلی کی بندش کا سامنا ہے۔
محکمہ موسمیات کے مطابق بلوچستان کے مختلف علاقوں میں بارش اور برفباری جاری ہے، جبکہ خیبرپختونخوا کے بالائی علاقوں میں بھی برفباری کا سلسلہ وقفے وقفے سے جاری ہے۔
آزاد کشمیر کے بلند و بالا مقامات پر برفباری شروع ہو چکی ہے اور سردی کی شدت میں اضافہ ہوا ہے۔ کراچی میں بھی تیز ہواؤں کے ساتھ بارش ہوئی ہے، جس سے موسم خوشگوار ہو گیا ہے۔
ترجمان سینٹرل ریجن کے مطابق موٹرویز پر بھی بارش کے باعث ڈرائیور حضرات کو محتاط رہنے کی ہدایات دی گئی ہیں۔ این ایچ اے اور پی ڈی ایم اے نے شمالی علاقوں میں برف ہٹانے کے عمل کو تیز کر دیا ہے۔
