چیف الیکشن کمشنر نے کہا پنجاب میں 2021 سے بلدیاتی انتخابات نہیں ہوئے، اور مقامی حکومتوں کی عدم موجودگی پر صوبائی حکومت کا جواز نہیں بنتا۔
لاہور: (رائیٹ ناوٴ نیوز) چیف الیکشن کمشنر سکندر سلطان راجا نے کہا ہے کہ اگر مقامی حکومتیں نہیں ہوتیں تو صوبائی حکومت کا جواز نہیں بنتا۔ انہوں نے پنجاب میں 2021 سے بلدیاتی انتخابات نہ ہونے پر تشویش کا اظہار کیا۔
الیکشن کمیشن میں بلدیاتی انتخابات میں تاخیر کے کیس کی سماعت ہوئی جس کی صدارت چیف الیکشن کمشنر کی سربراہی میں پانچ رکنی بینچ نے کی۔ انہوں نے اسپیشل سیکرٹری الیکشن کمیشن کی سربراہی میں کمیٹی تشکیل دی اور پنجاب حکومت کو ہدایت دی کہ 10 فروری تک دونوں کمیٹیاں مل کر کام مکمل کریں۔
چیف الیکشن کمشنر نے خبردار کیا کہ اگر مقررہ وقت پر عمل نہ ہوا تو الیکشن کمیشن خود معاملات سنبھالے گا۔ ضرورت پڑنے پر وزیر اعلیٰ پنجاب کو بھی طلب کیا جا سکتا ہے۔
سیکرٹری لوکل گورنمنٹ پنجاب نے بتایا کہ یونین کونسلز اور ٹاؤنز کی ڈیمارکیشن پر اعتراضات دور کیے جا رہے ہیں اور 26 جنوری تک مکمل کر لی جائے گی۔ چیف سیکرٹری پنجاب نے بتایا کہ اربن اور رورل علاقوں کی نشاندہی کا تنازع تاخیر کی وجہ بنا۔
چیف سیکرٹری نے مزید بتایا کہ پہلے منظوری کا اختیار وزیراعلیٰ کے پاس تھا، جو اب صوبائی کابینہ کے پاس ہے۔ الیکشن کمیشن نے کیس کی سماعت 20 فروری تک ملتوی کر دی۔
