کراچی: (رائیٹ ناوٴ نیوز) کراچی کے گل پلازہ میں پیش آنے والے سانحہ کے حوالے سے آتشزدگی کی تفصیلات سامنے آئی ہیں، جن کے مطابق آگ نے عمارت کے پچھلے حصے سے اگلے حصے تک پہنچنے میں صرف 11 منٹ لیے۔ یہ معلومات سی سی ٹی وی کیمروں کی فوٹیج کے ذریعے تیار کی گئی ٹائم لائن سے حاصل کی گئی ہیں، جو تحقیقات کا حصہ ہیں۔

سی سی ٹی وی فوٹیج میں دیکھا گیا کہ گل پلازہ کے پچھلے حصے میں رات 10 بج کر 7 منٹ پر آگ لگی، اور ایک منٹ بعد دھواں اٹھتا نظر آیا۔ چند ہی منٹوں میں آگ کی شدت میں اضافہ ہوا اور 10 بج کر 12 منٹ پر شعلے واضح ہو گئے، جس کے بعد امدادی سرگرمیوں کا آغاز ہوا اور ایمبولینسز موقع پر پہنچنا شروع ہوئیں۔

ایم اے جناح روڈ کی جانب پلازہ کے اگلے حصے میں آگ 10 بج کر 18 منٹ پر نظر آئی۔ اسی دوران فائر بریگیڈ کی گاڑیاں بھی علاقے میں پہنچ گئیں اور آگ پر قابو پانے کی کوششیں شروع ہوئیں۔ فوٹیج کے مطابق آگ انتہائی تیزی سے پھیلی اور مختصر وقت میں عمارت کو متاثر کر دیا۔

حکام نے بتایا کہ سی سی ٹی وی شواہد کی بنیاد پر آگ لگنے اور پھیلنے کے تمام مراحل کا جائزہ لیا جا رہا ہے تاکہ واقعے کی وجوہات اور حالات کا درست تعین کیا جا سکے۔ تحقیقات جاری ہیں اور حقائق سامنے آنے کے بعد مزید تفصیلات فراہم کی جائیں گی۔