ویٹیکن سٹی: (رائیٹ ناوٴ نیوز) ویٹیکن کے سیکریٹری آف اسٹیٹ کارڈینل پیئترو پیرولین نے کہا ہے کہ پوپ لیو چہاردہم امریکی صدر ڈونلڈ ٹرمپ کی جانب سے غزہ کی حکمرانی اور تعمیر نو کی نگرانی کے لیے قائم کیے جانے والے ‘بورڈ آف پیس’ میں شمولیت کی دعوت کا جائزہ لے رہے ہیں۔

روم میں فرانسیسکن انتظامیہ کے تحت پوپائی یونیورسٹی انتونیانم میں ایک تقریب کے بعد صحافیوں سے گفتگو کرتے ہوئے کارڈینل پیرولین نے تصدیق کی کہ ویٹیکن سٹی کو بھی اس بورڈ میں شامل ہونے کی دعوت موصول ہوئی ہے۔ ان کے مطابق پوپ کو یہ دعوت مل چکی ہے اور اس پر غور جاری ہے۔

کارڈینل پیرولین نے کہا کہ اس دعوت کا جواب دینے کے لیے کچھ وقت درکار ہے اور ویٹیکن اس حوالے سے مالی شمولیت کی پوزیشن میں نہیں۔ ان کے بقول، ویٹیکن کی صورتحال دیگر ممالک سے مختلف ہے، اس لیے اس معاملے پر الگ انداز میں غور کیا جا رہا ہے۔

وائٹ ہاؤس نے ‘بورڈ آف پیس’ کا باضابطہ اعلان 16 جنوری کو کیا تھا۔ یہ بورڈ غزہ تنازع کے خاتمے کے لیے ٹرمپ انتظامیہ کے 20 نکاتی جامع منصوبے کے دوسرے مرحلے کی نگرانی کرے گا، جس میں حکمت عملی کی رہنمائی، بین الاقوامی وسائل کی فراہمی اور احتساب شامل ہے۔

امریکی میڈیا رپورٹس کے مطابق اس بورڈ میں شمولیت کی مدت 3 سال ہوگی، تاہم مستقل نشست کے لیے 1 ارب ڈالر کی پیشکش بھی زیر غور ہے۔ اب تک ناروے اور فرانس نے بورڈ میں شامل ہونے سے انکار کیا ہے، جبکہ دیگر ممالک نے حتمی فیصلہ نہیں کیا۔

کارڈینل پیرولین نے عالمی سطح پر امریکا اور یورپ کے درمیان بڑھتی کشیدگی پر بھی تبصرہ کیا۔ انہوں نے کہا کہ بین الاقوامی قانون کا احترام ضروری ہے اور اختلافات کو تناؤ پیدا کیے بغیر بات چیت کے ذریعے حل کیا جانا چاہیے، کیونکہ موجودہ عالمی صورتحال سنجیدہ نوعیت کی ہے۔