نیویارک: (رائیٹ ناوٴ نیوز) ایلون مسک اور اوپن اے آئی کے چیف ایگزیکٹو سیم آلٹ مین کے درمیان مصنوعی ذہانت کی حفاظت پر تنازع شدت اختیار کر گیا ہے۔ مسک نے ایک سوشل میڈیا پوسٹ میں لوگوں کو خبردار کیا کہ وہ اپنے پیاروں کو چیٹ جی پی ٹی استعمال نہ کرنے دیں۔

مسک نے ایک پوسٹ کو دوبارہ شیئر کیا جس میں دعویٰ کیا گیا کہ چیٹ جی پی ٹی کو نو اموات سے جوڑا گیا ہے، جن میں پانچ کیسز میں خودکشی کا الزام شامل ہے۔ تاہم فوربز کے مطابق ان اعداد و شمار کی آزادانہ طور پر تصدیق نہیں ہو سکی۔

سیم آلٹ مین نے جواب دیا کہ ایسے واقعات اگر درست ہوں تو یہ افسوسناک ہیں، لیکن کسی ایک ٹیکنالوجی کو مورد الزام ٹھہرانا مناسب نہیں۔ انہوں نے مسک کے اپنے منصوبے، ٹیسلا کے آٹو پائلٹ سسٹم کے حادثات کو نشانہ بنایا۔

آلٹ مین نے کہا کہ ٹیسلا کے آٹو پائلٹ سے منسلک حادثات میں 50 سے زائد افراد ہلاک ہو چکے ہیں اور یہ نظام مکمل خودکار ڈرائیونگ فراہم نہیں کرتا۔ مسک نے کہا کہ آٹو پائلٹ انسانی غلطیوں کو کم کرتا ہے۔

مسک اور آلٹ مین کے درمیان یہ تنازع نئی بات نہیں، دونوں نے 2015 میں اوپن اے آئی کی بنیاد رکھی تھی۔ مسک 2018 میں ادارے سے الگ ہو گئے اور اوپن اے آئی کے منافع بخش ماڈل پر تنقید کرتے رہے۔