اسلام آباد: (رائیٹ ناوٴ نیوز) سپریم کورٹ میں وکلا کی عدم پیشی پر چیف جسٹس یحییٰ آفریدی نے برہمی کا اظہار کیا اور صدر سپریم کورٹ بار ہارون الرشید کو فوراً طلب کر لیا۔ عدالت میں وکلا کی غیر حاضری پر تشویش کا اظہار کرتے ہوئے چیف جسٹس نے ویڈیو لنک کی سہولت کے باوجود کیسز ملتوی کرنے کی درخواستوں پر ناراضگی ظاہر کی۔

چیف جسٹس یحییٰ آفریدی نے دوران سماعت کہا کہ وکلا کی جانب سے جلد سماعت کی درخواستیں دائر کی جاتی ہیں، مگر وہ پیش نہیں ہوتے۔ انہوں نے بار کے ذریعے وکلا کو عدالت میں حاضری یقینی بنانے کی ہدایت دی۔

صدر سپریم کورٹ بار نے تجویز دی کہ غیر حاضر وکلا پر جرمانہ عائد کیا جائے، تاہم چیف جسٹس نے کہا کہ پہلے جرمانہ نہیں کریں گے لیکن وکلا کو حاضر رہنے کا پابند کرنا ضروری ہے۔

چیف جسٹس نے واضح کیا کہ وکلا کی غیر حاضری عدالتی کارروائی کو متاثر کر رہی ہے، اس لیے سخت اقدامات کی ضرورت ہے۔