اسلام آباد: (رائیٹ ناوٴ نیوز) پارلیمانی امور کے وزیر ڈاکٹر طارق فضل چوہدری نے جمعہ کو سینیٹ کو بتایا کہ 18 سال سے کم عمر بچوں کا بے قابو سوشل میڈیا استعمال ایک سنگین مسئلہ ہے، جس کے حل کے لیے تمام ریاستی اداروں کی مربوط کوششیں ضروری ہیں۔

سینیٹر فلک ناز اور دیگر کی جانب سے بچوں کے سوشل میڈیا کے غیر معیاری استعمال پر توجہ دلاؤ نوٹس کے جواب میں وزیر نے کہا کہ یہ مسئلہ سیاسی نہیں بلکہ قومی نوعیت کا ہے جو کسی ایک دور حکومت یا کسی ایک جماعت تک محدود نہیں۔

انہوں نے کہا کہ یہ مسئلہ اندرون و بیرون ملک بڑھ رہا ہے اور کوئی بھی ملک اس کو مکمل طور پر قابو نہیں کر سکا۔ انہوں نے تجویز دی کہ سینیٹ میں ایک خصوصی کمیٹی بنائی جائے تاکہ بچوں کو ڈیجیٹل نقصانات سے بچانے کے لیے جامع حکمت عملی تیار کی جا سکے۔

سینیٹر فلک ناز نے توجہ دلاؤ نوٹس میں کہا کہ لاکھوں بچے ٹک ٹاک، انسٹاگرام اور دیگر پلیٹ فارمز کا بغیر نگرانی استعمال کر رہے ہیں، جس سے وہ غیر مناسب مواد، آن لائن ہراسمنٹ، نفسیاتی نقصانات اور خطرناک رحجانات کا شکار ہو رہے ہیں۔

دریں اثنا، سینیٹر جان محمد بلیڈی کے سوال کے جواب میں، طارق فضل چوہدری نے واضح کیا کہ قائد اعظم یونیورسٹی کے اندر کوئی آپریشن نہیں کیا جا رہا۔ حالیہ آپریشن سفارتی انکلیو کے قریب مسلم کالونی میں غیر قانونی تجاوزات کے خاتمے کے لیے کیا گیا۔