اسلام آباد: (رائیٹ ناوٴ نیوز) بجلی کے شعبے میں گزشتہ مالی سال کے دوران 800 ارب روپے کا خسارہ ہوا ہے۔ چھ بجلی کی تقسیم کار کمپنیاں نقصانات میں رہیں، جس کی وجہ سے مجموعی مالی حالت متاثر ہوئی۔

وزارت خزانہ کی رپورٹ کے مطابق بجلی کے شعبے کی کل ذمہ داریاں 9.2 ٹریلین روپے جبکہ کل اثاثے 8.4 ٹریلین روپے تھیں۔ نقصانات کی وجہ تقسیم کار کمپنیوں کے نقصانات، چوری، پیداواری کمپنیوں کی قیمتوں کا دوبارہ تعین، گردشی قرضہ اور غیر مستحکم کاروباری ماڈل بتایا گیا ہے۔

چار کمپنیاں منافع میں رہیں، جن میں گوجرانوالہ اور قبائلی بجلی سپلائی کمپنیاں شامل ہیں، جنہوں نے بالترتیب 13.6 ارب اور 9.4 ارب روپے کا منافع کمایا۔

وزارت خزانہ نے بجلی کی تقسیم کار کمپنیوں کی نجکاری کا اعلان کیا ہے۔ پشاور اور کوئٹہ کمپنیاں بھی نقصانات میں ہیں، جن کی مجموعی نقصانات بالترتیب 764 اور 825 ارب روپے تک پہنچ گئے ہیں۔

بجلی کی قیمتوں میں اضافے اور 3.23 روپے فی یونٹ سرچارج کی وجہ سے توانائی کی قیمتیں خطے میں سب سے زیادہ ہو چکی ہیں۔ صارفین نے سستی توانائی کے لئے سولر پینلز کا رخ کیا ہے۔