اسلام آباد: (رائیٹ ناوٴ نیوز) سینٹ کی قائمہ کمیٹی میں ریلوے کے پٹرول پمپ کی سستے داموں نیلامی پر گرما گرم بحث ہوئی۔ حکومتی سینیٹر ناصر بٹ نے ریلوے افسران سے سخت سوالات کیے جبکہ وزیر ریلوے نے تحمل کی تلقین کی۔

سینیٹر ناصر بٹ نے ریلوے افسران سے دریافت کیا کہ بھلوال میں پٹرول پمپ سستے داموں کیوں نیلام ہوا۔ ریلوے حکام نے بتایا کہ لیز منسوخ کی جا چکی ہے اور دوبارہ نیلامی کی جائے گی۔ ناصر بٹ نے سوال اٹھایا کہ اگر نیلامی شفاف ہوتی تو کمیٹی کو نشاندہی نہ کرنی پڑتی۔

وزیر ریلوے نے کہا کہ کسی کی جرات نہیں کہ ضابطے کی خلاف ورزی کرتے ہوئے کچھ حاصل کرے، اور حنیف عباسی نے ناصر بٹ کو افسران سے نرمی سے بات کرنے کی تلقین کی۔

کمیٹی کو گوادر بندرگاہ سے ریل رابطے، گوادر کوئٹہ لائن کی تعمیر اور کراچی میں ریلوے اراضی پر قبضے کے متعلق بریفنگ دی گئی۔ وزیر ریلوے نے بتایا کہ منصوبے کی فنانس پر کام ہو چکا ہے اور ایم ایل ون کے سکھر سیکشن کے معاہدے کے لئے ایشیائی ترقیاتی بینک کی ٹیم تئیس جنوری کو پاکستان آ رہی ہے۔