پشاور: (رائیٹ ناوٴ نیوز) خیبر پختونخوا کے فلور ملز مالکان نے خبردار کیا ہے کہ اگر پنجاب نے گندم اور آٹے کی ترسیل پر عائد پابندی ختم نہ کی تو رمضان المبارک میں آٹے کا بحران شدت اختیار کر سکتا ہے۔ آٹے کی قیمتوں میں بھی ممکنہ اضافہ ہو سکتا ہے۔

پاکستان فلور ملز ایوسی ایشن کے صوبائی چیئرمین نعیم بٹ کے مطابق، اگست سے پنجاب کی جانب سے غیر قانونی طور پر گندم کی ترسیل پر پابندی عائد ہے جس کی وجہ سے آٹے کی قیمت میں اضافہ ہو رہا ہے۔ اس وقت 20 کلو آٹے کا تھیلا 3000 روپے تک پہنچ چکا ہے۔

نعیم بٹ نے الزام لگایا کہ پنجاب سے آنے والی گندم اور آٹے پر چیک پوسٹوں پر بھتہ وصول کیا جا رہا ہے، جس کی وجہ سے خیبر پختونخوا میں آٹے کی قیمت میں اضافہ ہو رہا ہے۔ انہوں نے حکومت سے مطالبہ کیا کہ پابندی کو فوری طور پر ختم کیا جائے تاکہ عوام کو معاشی مشکلات سے بچایا جا سکے۔

مزید برآں، خیبر پختونخوا کے محکمہ خوراک کی جانب سے گندم ریلیز نہ ہونے کی وجہ سے فلور ملز بند ہو رہی ہیں اور مزدور بے روزگار ہو رہے ہیں۔ اگر بروقت پابندی نہ اٹھائی گئی تو رمضان میں آٹے کی قلت شدت اختیار کر سکتی ہے۔