تہران: (رائیٹ ناوٴ نیوز) ایران کی وزارت خارجہ نے نئی امریکی پابندیوں کی مذمت کرتے ہوئے انہیں غیر قانونی اور ملک کے خلاف ‘گہری نفرت’ پر مبنی قرار دیا ہے۔

وزارت نے ان اقدامات کو غیر انسانی قرار دیتے ہوئے کہا کہ یہ اقوام متحدہ کے چارٹر اور بین الاقوامی قانون کے اصولوں کی خلاف ورزی ہیں۔

وزارت کے ترجمان اسماعیل باغائی نے خبردار کیا ہے کہ ان پابندیوں کے ایران سے باہر بھی سنگین نتائج ہوں گے کیونکہ یکطرفہ امریکی اقدامات عالمی تجارتی نظام کو نقصان پہنچاتے ہیں۔

اقوام متحدہ اور اس کے اداروں کی ذمہ داری ہے کہ وہ بین الاقوامی قانون کو برقرار رکھیں اور جبری معاشی کارروائیوں کو روکیں۔

ٹرمپ نے کہا ہے کہ ایران سے تجارت کرنے والے ممالک کو امریکہ کے ساتھ کاروبار پر 25 فیصد ٹیرف کا سامنا کرنا پڑے گا۔