لاہور: (رائیٹ ناوٴ نیوز) وزیر اطلاعات پنجاب عظمیٰ بخاری نے کہا ہے کہ ریڈیو پاکستان پر حملے میں پی ٹی آئی کے لوگ براہ راست ملوث پائے گئے ہیں۔ انہوں نے کہا کہ 9 مئی کو پشاور ہنگاموں میں بھی تحریک انصاف کا کردار تھا۔

پریس کانفرنس کے دوران عظمیٰ بخاری نے کہا کہ پاکستان میں ہر سال نئی خوشخبریاں آرہی ہیں اور وزیراعلیٰ مریم نواز کے اقدامات کو عالمی سطح پر سراہا جا رہا ہے۔ انہوں نے مزید کہا کہ ملک میں ایک فساد گروپ پیدا کیا گیا ہے جو انارکی پھیلانے کی کوشش میں ہے۔

عظمیٰ بخاری نے کہا کہ حالیہ فرانزک رپورٹ کے مطابق پشاور میں ریڈیو پاکستان پر حملے میں پی ٹی آئی کے لوگ ملوث تھے اور یہ کہتے ہیں کہ رپورٹ لاہور میں تیار کی گئی۔ انہوں نے پی ٹی آئی پر الزام عائد کیا کہ وہ جرم کو ماننے سے انکار کرتے ہیں اور شرمندگی کے آخری مقام پر کھڑے ہیں۔

انہوں نے مزید کہا کہ سہیل آفریدی نے فیس بک پر ویڈیوز شیئر کیں اور پی ٹی آئی کے لوگ 9 مئی کے واقعات کو فالز فلیگ قرار دیتے ہیں۔ انہوں نے کہا کہ یقین ہے کہ سہیل آفریدی نے مزار قائد پر جا کر معافی مانگی ہوگی۔

عظمیٰ بخاری نے کہا کہ سیاست کو بدنام کرنے والے لوگ فساد پر اکساتے ہیں اور پی ٹی آئی نے 8 فروری کو دوبارہ فساد کا پروگرام بنایا ہوا ہے۔ انہوں نے کہا کہ کسی کو قانون کو اپنے مفاد میں استعمال کرنے کی اجازت نہیں دی جاسکتی۔