لاہور: (رائیٹ ناوٴ نیوز) پنجاب حکومت نے اعلان کیا ہے کہ یکم فروری سے صوبے کے 15 محکموں کی 210 سرکاری خدمات ای بز پورٹل پر آن لائن دستیاب ہوں گی، جس سے شہریوں کو سرکاری دفاتر جانے کی ضرورت نہیں ہوگی۔

یہ اقدام وزیراعلیٰ کے ڈیجیٹل گورننس پلان کا حصہ ہے، جس کے مطابق خدمات کی تعداد مارچ تک بڑھا کر 310 کی جائے گی۔ حکام کا کہنا ہے کہ اس سے شہریوں کو ایک ہی پلیٹ فارم سے سرکاری خدمات تک وسیع رسائی ملے گی۔

یہ فیصلہ ایڈمنسٹریٹو سیکریٹریز کمیٹی کے اجلاس میں کیا گیا، جس کی صدارت چیف سیکریٹری پنجاب زاہد اختر زمان نے کی۔ اجلاس میں ای گورننس کے نفاذ کی رفتار تیز کرنے کے اقدامات کا جائزہ لیا گیا۔

چیف سیکریٹری نے پنجاب انفارمیشن ٹیکنالوجی بورڈ کو ہدایت کی کہ مارچ تک 310 خدمات کو ای بز پورٹل پر شامل کیا جائے۔ انہوں نے محکموں کو یہ بھی کہا کہ فیلڈ دفاتر کو مرحلہ وار ای ایف او اے ایس نظام میں منتقل کیا جائے۔

زاہد اختر زمان نے کہا کہ انتظامی عمل کی ڈیجیٹلائزیشن سے شہریوں کو سرکاری دفاتر کے دورے کم کرنے، شفافیت میں اضافہ اور تیز فیصلوں کی توقع ہے۔