پبی: (رائیٹ ناوٴ نیوز) پاکستان اور امریکا کی افواج کے درمیان 13ویں دوطرفہ مشترکہ فوجی مشق ‘انسپائرڈ گیمبٹ–2026’ کا آغاز 9 جنوری 2026 کو نیشنل کاؤنٹر ٹیررازم سینٹر (این سی ٹی سی) میں ہوا۔ یہ مشق دو ہفتوں تک جاری رہے گی جس کا مقصد انسداد دہشت گردی کے شعبے میں پیشہ ورانہ مہارتوں کو فروغ دینا ہے۔

آئی ایس پی آر کے مطابق افتتاحی تقریب میں پاکستان اور امریکا کے سینئر عسکری حکام نے شرکت کی۔ مشق کے دوران دونوں افواج تجربات کا تبادلہ کریں گی، باہمی فہم و اعتماد کو مضبوط بنائیں گی اور آپریشنل حکمت عملی کو بہتر بنائیں گی۔

اس مشق میں شہری علاقوں میں کارروائیوں کے دوران مارکس مین شپ کی مہارتوں پر خصوصی توجہ دی جا رہی ہے۔ بیان میں کہا گیا ہے کہ ایسی مشترکہ مشقیں دونوں ممالک کی فوجوں کی پیشہ ورانہ صلاحیتوں کو بڑھانے میں اہم کردار ادا کرتی ہیں۔

انسپائرڈ گیمبٹ–2026 خطے میں امن و استحکام کے لیے پاکستان اور امریکا کے باہمی تعاون کا عزم ظاہر کرتی ہے۔