واشنگٹن: (رائیٹ ناوٴ نیوز) امریکہ کے سیکریٹری آف اسٹیٹ مارکو روبیو نے اعلان کیا ہے کہ وہ آئندہ ہفتے ڈنمارک کی حکومت کے ساتھ گرین لینڈ کے حوالے سے بات چیت کریں گے۔ اس سے قبل امریکی صدر ڈونلڈ ٹرمپ نے گرین لینڈ پر کنٹرول حاصل کرنے کا عندیہ دیا تھا، جس کے بعد بین الاقوامی سطح پر تناؤ بڑھا۔

صدر ٹرمپ نے کہا کہ گرین لینڈ کے معاملے پر امریکی فوجی آپشن موجود ہے اور اگر ضرورت پڑی تو وہ فوجی راستہ اختیار کر سکتے ہیں۔ اس بیان کے بعد ڈنمارک نے امریکی حکام سے ملاقات کی درخواست کی تھی۔

ڈنمارک کے وزیر خارجہ لارز لوکے راسموسن نے کہا کہ گرین لینڈ کی حکومت اور ڈنمارک نے مشترکہ طور پر یہ ملاقات طے کی ہے تاکہ امریکی بیانات کی وضاحت ہو سکے اور کسی قسم کی غلط فہمی دور کی جا سکے۔

ڈنمارک کی وزیر اعظم میٹے فریڈریکسن نے خبردار کیا کہ اگر امریکہ گرین لینڈ پر حملہ کرتا ہے تو یہ نیٹو اتحاد کے خاتمے کا باعث ہوگا۔ صدر ٹرمپ کا موقف ہے کہ امریکہ کو آرکٹک میں بڑھتے ہوئے خطرات کے پیش نظر گرین لینڈ پر کنٹرول حاصل کرنا ضروری ہے۔

سیکریٹری آف اسٹیٹ مارکو روبیو نے کہا کہ امریکی انتظامیہ گرین لینڈ کو خریدنے کی خواہاں ہے، جو ڈنمارک کا خود مختار علاقہ ہے اور نیٹو کا حصہ بھی ہے، اور فی الحال فوجی طاقت کا استعمال نہیں کرنا چاہتی۔