لاہور: (رائیٹ ناوٴ نیوز)

لاہور میں ایک اوورسیز پاکستانی کو اس وقت ای چالان موصول ہوا جب کسی نے ان کی موٹر سائیکل پر جعلی نمبر پلیٹ لگا کر سڑک پر چلائی۔ متاثرہ شہری کے مطابق ان کی موٹر سائیکل واقعے کے روز گھر پر کھڑی تھی۔

مذکورہ خلاف ورزی کے دوران، موٹر سائیکل سوار نے ہیلمٹ بھی نہیں پہنا جس پر ٹریفک قوانین کی خلاف ورزی کا ای چالان اوورسیز پاکستانی کے گھر بھیجا گیا۔ یہ خلاف ورزی 28 دسمبر کو ہوئی، اور چالان کی تصویر میں موٹر سائیکل چلانے والے کا چہرہ واضح ہے۔

متاثرہ شہری کے بھائی قاسم منیر نے تھانہ مسلم ٹاؤن میں قانونی کارروائی کے لیے درخواست جمع کرائی ہے اور مطالبہ کیا ہے کہ جعلی نمبر پلیٹ استعمال کرنے والے کے خلاف فوری کارروائی کی جائے۔