لاہور: (رائیٹ ناوٴ نیوز) انسانی اسمگلنگ اور بدعنوانی کی بڑھتی شکایات کے بعد وفاقی تحقیقاتی ادارے (ایف آئی اے) نے 76 اہلکاروں کو ملازمت سے برطرف، نو کو تنزلی اور دیگر 127 کو مختلف سزائیں دیں۔ یہ کارروائیاں 2025 کے آخری چار مہینوں میں مکمل کی گئیں۔

ایف آئی اے نے ادارے میں اصلاحات کے تحت اگست 2025 میں داخلی احتساب کا پہلا ڈائریکٹوریٹ قائم کیا تاکہ کرپٹ افسران کی نگرانی کی جا سکے۔ زونل سطح پر اسی طرح کے ڈھانچے بھی بنائے گئے۔

ایک سینئر افسر نے بتایا کہ یورپ اور افریقہ میں کشتیوں کے حادثات کے بعد انسانی اسمگلنگ کے عناصر کو پکڑنے کے لیے سخت احتسابی نظام متعارف کرایا گیا۔

ایف آئی اے کے اہلکاروں کو 214 محکمانہ تحقیقات کے بعد سزائیں دی گئیں، جن میں 20 فیصد سزا امیگریشن شکایات پر، 20 فیصد ناقص تحقیقات پر اور 40 فیصد بے ضابطگی اور نااہلی پر دی گئیں۔

اس اقدام کے پیچھے وزیر داخلہ کی مکمل حمایت تھی، جنہوں نے ایف آئی اے کو نااہل اور بدعنوان اہلکاروں سے پاک کرنے کا ہدف دیا تھا۔