اسلام آباد: (رائیٹ ناوٴ نیوز) پاکستان کی برآمدات میں ستمبر کے دوران 11 فیصد کمی واقع ہوئی ہے، جسے چیرمین پاکستان ٹیکسٹائل کونسل فواد انور نے ایک اہم بحران قرار دیا ہے۔ پہلی سہ مَاہی میں برآمدات میں 3.4 فیصد کمی ریکارڈ کی گئی۔

فواد انور کے مطابق ٹیکسٹائل برآمدات میں 2 فیصد، کاٹن برآمدات میں 7.8 فیصد اور نِٹ فیبرکس میں 29.5 فیصد کمی دیکھی گئی ہے، جو روایتی شعبے پر شدید دباؤ ڈال رہی ہے۔

انہوں نے کہا کہ پاکستان عالمی مارکیٹ میں اپنی مسابقت کھو رہا ہے اور اہم برآمدی مصنوعات میں دو عددی کمی کو فوری توجہ کی ضرورت ہے۔

فواد انور نے انتباہ دیا کہ اگر حکومت نے فوری اقدامات نہیں کیے تو برآمدی معیشت کو ناقابلِ تلافی نقصان پہنچے گا۔ کارخانوں پر دباؤ بڑھ رہا ہے اور آرڈرز دوسرے ممالک منتقل ہو رہے ہیں۔

انہوں نے مزید کہا کہ اگر درستگی کے اقدامات نہ ہوئے تو پاکستان کی برآمدی بنیاد خطرے میں پڑ جائے گی۔