واشنگٹن: (رائیٹ ناوٴ نیوز) امریکی وزارتِ دفاع نے بوئنگ کمپنی کو اسرائیل کے لیے جدید ایف-15 طیاروں کی فراہمی کا 8.6 ارب ڈالر کا معاہدہ دیا ہے۔ یہ معاہدہ امریکی صدر ڈونلڈ ٹرمپ اور اسرائیلی وزیرِاعظم بنیامین نیتن یاہو کی ملاقات میں طے پایا۔

اس معاہدے کے تحت اسرائیلی فضائیہ کے لیے 25 نئے ایف-15 آئی اے طیارے تیار کیے جائیں گے، مزید 25 طیاروں کا آپشن بھی شامل ہے۔ معاہدہ غیر ملکی فوجی فروخت پروگرام کے تحت کیا گیا ہے جس میں طیاروں کا ڈیزائن، جدید نظاموں کی تنصیب اور ترسیل شامل ہیں۔

امریکا طویل عرصے سے اسرائیل کا بڑا اسلحہ فراہم کنندہ رہا ہے اور یہ معاہدہ دونوں ممالک کے دفاعی تعلقات کو مزید مضبوط کرتا ہے۔ دوسری جانب فلسطین کے حامی مظاہرین اسرائیل کو فوجی امداد کی بندش کا مطالبہ کر رہے ہیں۔

پینٹاگون کے مطابق معاہدے پر کام سینٹ لوئس میں کیا جائے گا اور اس کی تکمیل 31 دسمبر 2035 تک متوقع ہے۔