کراچی: (رائیٹ ناوٴ نیوز) کراچی کی سیشنز کورٹ میں زیر سماعت مقدمے کے دوران یوٹیوبر رجب بٹ پر تشدد کا مقدمہ درج کرلیا گیا ہے۔ ان کا الزام ہے کہ وکلا نے ان پر حملہ کیا اور ان کا بیگ چھین لیا جس میں تین لاکھ روپے موجود تھے۔

ایف آئی آر کے مطابق، یہ واقعہ پیر کو سیشنز کورٹ سینٹرل میں پیش آیا جہاں رجب بٹ اپنی عبوری ضمانت ختم ہونے پر پیش ہوئے تھے۔ وکلا نے ان پر حملہ کیا اور بیگ چھین لیا۔ بعد میں ایک وکیل نے بیگ واپس دلایا لیکن رقم غائب تھی۔

رجب بٹ کے وکیل میاں علی اشفاق نے سوشل میڈیا پر بیان دیا کہ یہ حملہ غیر پیشہ ورانہ ہے اور وکلا کی ساکھ کو نقصان پہنچاتا ہے۔ انہوں نے کہا کہ قانون کو اپنے ہاتھ میں لینا ناقابل قبول ہے۔

رجب بٹ اور ندیم مبارک مختلف مقدمات کا سامنا کر رہے ہیں اور دونوں 10 دسمبر کو لندن سے واپس آئے تھے۔ سیشنز کورٹ میں زیر سماعت مقدمے میں رجب بٹ کی عبوری ضمانت میں 13 جنوری تک توسیع کر دی گئی ہے۔

مقدمے کا پس منظر یہ ہے کہ ریاض سولنگی نے جنوری میں حیدری مارکیٹ تھانے میں رجب بٹ کے خلاف درخواست دی تھی، جب انہوں نے یوٹیوبر کی ایک ویڈیو دیکھی جس میں رجب بٹ مبینہ طور پر موسیقی کے ساتھ نماز ادا کر رہے تھے۔