کابل: (رائیٹ ناوٴ نیوز) افغانستان کی عبوری طالبان حکومت کے وزیر داخلہ سراج الدین حقانی نے کہا ہے کہ افغانستان کسی بھی ریاست کے لیے خطرہ نہیں اور غلط فہمیوں کے خاتمے کے لیے مذاکرات کا راستہ کھلا ہے۔

کابل پولیس اکیڈمی کی گریجویشن تقریب میں سراج الدین حقانی نے کہا کہ مسائل کا حل تصادم میں نہیں بلکہ مذاکرات میں ہے اور افغان حکومت اس حوالے سے سنجیدہ کوششیں کر رہی ہے۔ انہوں نے دوحہ معاہدے کے تحت وعدوں پر قائم رہنے اور افغانستان کی سرزمین کو کسی ملک کے خلاف استعمال نہ ہونے کی یقین دہانی کرائی۔

انہوں نے عالمی برادری کو یقین دلایا کہ افغانستان خطے میں عدم استحکام کا باعث نہیں بنے گا۔ تاہم پاکستان میں سرحد پار سے دراندازی کے واقعات پر تشویش کا اظہار کیا گیا ہے۔ سراج الدین حقانی کے بیان کو پاکستان کے دیرینہ مؤقف کے تناظر میں دیکھا جا رہا ہے، جہاں کابل سے کالعدم تحریک طالبان پاکستان کے خلاف کارروائی کا مطالبہ ہوتا رہا ہے۔

پاکستان اور افغانستان کے تعلقات حالیہ برسوں میں سرحدی جھڑپوں اور سیکیورٹی خدشات کے باعث کشیدہ رہے ہیں۔ اکتوبر 2025 سے دونوں ممالک کے درمیان سرحدی گزرگاہیں بند ہیں، جس سے سیکیورٹی، تجارت اور عوامی رابطے متاثر ہو رہے ہیں۔