بیجنگ: (رائیٹ ناوٴ نیوز) چین نے تائیوان کے مسئلے پر بڑھتی کشیدگی کے باعث 20 امریکی دفاعی کمپنیوں اور 10 اعلیٰ امریکی عہدیداروں پر پابندیاں عائد کر دی ہیں۔ چینی وزارت خارجہ کے مطابق، یہ فیصلہ امریکا کی جانب سے تائیوان کو 11.1 ارب ڈالر کا اسلحہ بیچنے کے بعد کیا گیا ہے۔

چین نے واضح کیا ہے کہ تائیوان کی سلامتی اس کی قومی خودمختاری کا مسئلہ ہے اور امریکا کی جانب سے ہتھیاروں کی فروخت اس کی ریڈ لائن کو چیلنج کرتی ہے۔ چینی وزارت خارجہ نے کہا کہ پابندیوں کے تحت شامل کمپنیوں اور افراد کے چین میں موجود اثاثے منجمد کر دیے گئے ہیں اور انہیں چین میں کاروبار یا داخلے کی اجازت نہیں ہوگی۔

پابندیوں کا شکار ہونے والے افراد میں دفاعی کمپنیوں کے بانی اور اعلیٰ عہدیدار شامل ہیں۔ چین نے امریکا پر زور دیا ہے کہ وہ ون چائنا اصول کا احترام کرے اور تائیوان کو ہتھیار فراہم کرنا بند کرے۔ اسلحے کی فروخت پر چین کا اعتراض ہے کیونکہ وہ تائیوان کو اپنی خودمختاری کا حصہ مانتا ہے۔