لاہور: (رائیٹ ناوٴ نیوز) لاہور سیالکوٹ موٹروے ایم-11 کو دھند کے باعث عارضی طور پر بند کر دیا گیا ہے۔ موٹروے پولیس کے سنٹرل ریجن کے ترجمان نے بتایا کہ یہ اقدام عوام کی حفاظت کے لیے اٹھایا گیا ہے۔

ترجمان نے ڈرائیورز کو ہدایت کی ہے کہ وہ لین ڈسپلن پر عمل کریں اور غیر ضروری سفر سے گریز کریں۔ شہریوں کو مشورہ دیا گیا ہے کہ وہ دن کے اوقات میں سفر کریں کیونکہ صبح 10 بجے سے شام 6 بجے تک دھند میں سفر محفوظ رہتا ہے۔

ڈرائیورز کے لیے فوگ لائٹس کا استعمال لازمی قرار دیا گیا ہے اور تیز رفتاری سے پرہیز کرنے کی تاکید کی گئی ہے۔ موٹروے پولیس نے مزید کہا کہ کسی بھی ہنگامی صورتحال یا رہنمائی کے لیے ہیلپ لائن نمبر 130 پر رابطہ کیا جا سکتا ہے۔

ترجمان نے کہا کہ عوام کی حفاظت اولین ترجیح ہے، موٹروے کی بندش ممکنہ خطرات سے بچاؤ کے لیے کی گئی ہے۔