راولپنڈی: (رائیٹ ناوٴ نیوز) علیمہ خان نے ان پارٹی رہنماؤں پر تنقید کی ہے جو حکومت سے مذاکرات کی بات کرتے ہیں، ان کا کہنا ہے کہ یہ افراد عمران خان کے مؤقف کے ساتھ نہیں ہیں اور ان کے حقیقی ساتھی نہیں ہیں۔

علیمہ خان نے میڈیا سے گفتگو کرتے ہوئے کہا کہ بانی پی ٹی آئی عمران خان نے گزشتہ سال 22 نومبر کو پرامن احتجاج کی کال دی تھی جبکہ ان پر صرف پارٹی چیئرمین کا پیغام عوام تک پہنچانے کا الزام عائد کیا گیا۔

انہوں نے مزید کہا کہ ہمارے خلاف جھوٹی گواہی دینے والوں کو سزا ملنی چاہیے اور پاکستان میں انصاف ختم ہو چکا ہے۔ حالانکہ عدلیہ میں اچھے ججز موجود ہیں، مگر ان کی بات نہیں سنی جاتی۔

علیمہ خان نے توشہ خانہ کیس کو بوگس قرار دیتے ہوئے کہا کہ بانی پی ٹی آئی اور بشریٰ بی بی کے خلاف الزام صرف یہ ہے کہ مبینہ طور پر ہار کی قیمت کم لگوائی گئی اور اسی بنیاد پر 17 سال قید کی سزا سنائی گئی۔

انہوں نے کہا کہ بانی پی ٹی آئی عمران خان کو ملک سے باہر جانے کی پیشکش بھی ملتی رہیں لیکن انہوں نے ہمیشہ کہا کہ وہ اپنے مقدمات کا سامنا کریں گے۔