لاہور: (رائیٹ ناوٴ نیوز) معروف ٹک ٹاک اسٹار جنت مرزا کو برائیڈل کاؤچر ویک میں ڈیزائنر ایچ ایس وائے کے لیے ریمپ واک کرنے پر سوشل میڈیا صارفین کی جانب سے شدید تنقید کا سامنا کرنا پڑا۔ صارفین نے جنت کی واک کو ‘غیر پیشہ ورانہ’ قرار دیتے ہوئے ‘سلیپ واک’ اور ‘ممی واک’ جیسے القابات دیے۔

تنقید کے بعد جنت مرزا نے وضاحت پیش کرتے ہوئے اعتراف کیا کہ ریمپ واک ان کی توقع سے زیادہ مشکل ثابت ہوئی۔ انہوں نے کہا کہ ان کا لباس بہت بھاری تھا اور کچھ مسائل بھی تھے جن کا ذکر نہیں کیا جا سکتا، جس کی وجہ سے چیزیں ریہرسل کے مطابق نہ ہو سکیں۔

سینئر اداکارہ اور سابق ماڈل عفت عمر نے بھی برائیڈل ویک میں نظر آنے والی صورتحال پر برہمی کا اظہار کرتے ہوئے کہا کہ ملبوسات ماڈلز کے مطابق مکمل فِٹ ہونے چاہئیں اور انہیں اس انداز میں ڈیزائن کیا جانا چاہیے کہ ریمپ پر چلتے وقت انہیں بار بار ہاتھوں سے اٹھانے یا سنبھالنے کی ضرورت نہ پڑے۔ عفت عمر نے واضح کیا کہ ریمپ پر واک کے دوران لباس پکڑنا پیشہ ورانہ اصولوں کے خلاف ہے۔

یہ واقعہ فیشن انڈسٹری میں پروفیشنل ماڈلز بمقابلہ سوشل میڈیا انفلوئنسرز کی بحث کو ایک بار پھر سے چھیڑ چکا ہے۔