ایڈیلیڈ: (رائیٹ ناوٴ نیوز) انگلینڈ کرکٹ ٹیم کے ہیڈ کوچ برینڈن میکلم نے ایشز سیریز میں ابتدائی تین ٹیسٹ میچز میں شکست کے بعد تسلیم کیا ہے کہ ٹیم کی تیاریوں پر اٹھنے والے سوالات جائز ہیں۔ ایڈیلیڈ ٹیسٹ میں 82 رنز کی شکست کے بعد آسٹریلیا نے سیریز میں 0-3 کی ناقابلِ تلافی برتری حاصل کر لی ہے۔

میچ کے بعد برینڈن میکلم نے کہا کہ آسٹریلوی ٹیم نے انگلینڈ کو بیٹنگ، بولنگ اور فیلڈنگ تینوں شعبوں میں مکمل طور پر آؤٹ پلے کیا ہے۔ ان کا کہنا تھا کہ حالیہ برسوں میں یہ آسٹریلوی ٹیم سب سے زیادہ منظم اور خطرناک نظر آئی ہے۔

میکلم نے اعتراف کیا کہ انگلینڈ کی ٹیم بڑے مواقع پر دباؤ برداشت کرنے میں ناکام رہی اور سیریز میں اپنی صلاحیتوں کے مطابق کارکردگی نہیں دکھا سکی۔ انہوں نے کہا کہ ہم ناکام رہے اور بڑے خواب اور بلند اہداف لے کر آئے تھے۔

ایڈیلیڈ ٹیسٹ کے آخری دن انگلینڈ نے 435 رنز کے ہدف کے تعاقب میں 352 رنز بنائے، جو اس دورے میں ان کا سب سے بڑا اسکور تھا۔ تاہم کوئی بلے باز سنچری نہ بنا سکا، جس پر میکلم نے مایوسی کا اظہار کیا۔

میکلم نے تسلیم کیا کہ ابتدائی ٹیسٹ میچز سے قبل تیاریوں میں شاید غلطیاں ہوئیں اور مزید میچ پریکٹس کی ضرورت تھی۔ انہوں نے کہا کہ انگلینڈ ٹیم اب باکسنگ ڈے ٹیسٹ میں وقار کے لیے میدان میں اترے گی۔