اسلام آباد: (رائیٹ ناوٴ نیوز) وفاقی حکومت کی جانب سے پہلے 20 مہینے کے دوران قرض کی تفصیلات سامنے آئی ہیں، جس میں 12 ہزار 169 ارب روپے کا اضافہ ریکارڈ کیا گیا۔ یہ اضافہ مارچ 2024 سے اکتوبر 2025 کے عرصے میں ہوا۔

اسٹیٹ بینک آف پاکستان کی دستاویزات کے مطابق، اس دوران وفاقی حکومت کے مقامی قرضے میں 11 ہزار 300 ارب روپے اور بیرونی قرضے میں 869 ارب روپے کا اضافہ ہوا، جس کے بعد اکتوبر 2025 تک وفاقی حکومت کا کل قرضہ 76 ہزار 979 ارب روپے تک پہنچ گیا، جبکہ فروری 2024 تک یہ 64 ہزار 810 ارب روپے تھا۔

دستاویزات کے مطابق، فروری 2024 تک مرکزی حکومت کا مقامی قرضہ 42 ہزار 675 ارب روپے تھا جو اکتوبر 2025 تک 53 ہزار 975 ارب روپے تک بڑھ گیا۔ اسی طرح، فروری 2024 تک وفاقی حکومت کا بیرونی قرضہ 22 ہزار 134 ارب روپے تھا اور اکتوبر 2025 تک یہ 23 ہزار ارب روپے سے تجاوز کر چکا ہے۔